خبز التميس ( الخبز الافغانى )
هذا خبز منتشر في دولتي أفغانستان وباكستان والدول المجاورة والسعودية، غالبا ًيؤكل التميس مع الفول والنواشف (جبن، مربى، حلاوة طحينيه، لبنة)
المقادير :-
٣ كوب دقيق
٣ معلقه كبيره حليب بودره
٣ معلقه كبيره سمنه بدرجه حراره المطبخ (طريه مش سايحه)
معلقه كبيره سكر
معلقه صغيره خميره
نصف معلقه صغيره ملح
نصف معلقه صغيره كربوناتو (لو مش موجود استخدمي معلقه صغيره بيكنج بودر)
ماء دافئ للعجن
الطريقه :-
هنخلط الدقيق مع السكر والملح والخميره والبيكنج بودر والحليب البودره مع بعض
هنضيف الماء الدافئ تدريجيا مع العجن كويس لحد ما تتكون عجينه معانا
نضيف السمنه الطريه قطعه بقطعه مع العجن ( بنضيف السمنه في الاخر عشان العجينه تورق)
نغطي العجينه ونسيبها تخمر وبعد كده نقطعها كرات ونغطيها ونسيبها شويه كمان تخمر تاني
هنفرد كل كره من العجين علي رشه دقيق زي رغيف العيش ويكون السمك حوالي ربع سم
في طريقه تانيه لفرد العجين عشان تكون مورقه أكتر وهي ان كل كره من العجين نشكلها زي رول رفيع وبعدين نلفها حوالين نفسها ونسيبها ترتاح وبعدين نبططها
لو عاوزين الخبز بالجبنه يبقي نفرد العجينه زي الرغيف ونحط جبنه شيدر سلايدز بتاع البرجر
ونقفل العيش تاني ونرجع نبططه
بشوكه هنخرم الخبز كتير وندهن الوجه بالحليب ونرش حبه البركه لو تحبوا
نيجي بقي لطريقه التسويه طبعا هو ليه أفران خاصه
إحنا بقي هنجيب أي صاج بنخبز فيه وندخله فاضي الفرن ونشغل الفرن علي أعلي حاجه حوالي ربع ساعه لحد ما الصاج يسخن جدااااااا ونطفي الفرن ونشغل الشوايه
هنحط رغيف التميس علي أي طبق مسطح أو البلانشه اللي بنقطع عليها الخضار ونحط تحته دقيق كتير شويه عشان الرغيف مش يلزق ويبقي سهل انه يتحرك معانا
ونحطه علي الصاج اللي في الفرن( ممكن اللي عنده المطرحه الموجوده في الفلاحين والافران الفلاحي يستخدمها)
يبقي دلوقت احنا مسخنين الفرن جداااااونقفل الفرن
يدوب خمس دقايق هنلاقي الخبز استوي والوجه اتحمر نطلعه من الفرن ونحفظه في فوطه نضيفه عشان يفضل طري
ليست هناك تعليقات:
إرسال تعليق